بسم الله وعلى بركة الله أفتتح باكورة مشاركاتي بقصيده أتمنى أن تحوز على رضاكم والقادم أجمل بحول الله
ياوقت مديت لي يسراك قبل اليمين=طعناتك اللي بعد في خاطرك هاتها
والله لو إن الليالي تحشم الطيبين=ماكان ضاع إبن هادي في متاهاتها
من أول أسمع عن القسوه وظلم السنين=واليوم لا والله إلا شفت لوعاتها
بديت عمري سجين وشبت وأنا سجين=صارت دموعي لنفسي من ملذاتها
لاجيت بضحك يقول الحزن للضحك وين؟؟=مالك سوى ضيقة أنفاسك ووناتها
أصيح وأندب حظوظي لكن الصبر زين=ياما نفوسٍ تهاوت دون غاياتها
ياوقت مادام لك عندي طلابه ودين=تعال خذها وأنا جاهز لمداتها
ماني بقايل عسى وقتي يحن ويلين=بقول لله نفسي وإنكساراتها
وماني مدور على الضيقه رفيق وعوين=تكفيني الوتر لاعانقت سجداتها
ياما بشر يحسبون إن الصداقه تبين=لاذاقت النفس فــ الدنيا معاناتها
ولاضاقت الأرض وإزداد البكاء والحنين=تفشل ظنون البشر وتخيب هقواتها
الصدق في وقتنا ماعاد حبله متين=وياكثر ناسٍ تغرك في دعاياتها
العاقل اللي يميز هزلها والسمين=والجاهل اللي يصدق كذب حيلاتها
نقطه على السطر وألا خلها نقطتين=لاتخدعك طيبة أصحابك وضحكاتها
ياصاحبي خلنا من قول يمكن ولين=نفسي عزيزه ولاتخفاك صداتها
أنا إلى أقفيت مالديت للخلف عين=عيني لقدام وألا فوق نظراتها
تراك لازلت للشهري وربي مدين=وماني محاسبك في نفسك وسياتها
يكفيك طاريك حتى في قصيدي يبين=مابه قصيده خلا ذكرك من أبياتها
عبدالله اللي تعرفه زين ماهو بزين=صارت دموعه لنفسه من ملذاتها
بقلم أخوكم : عبدالله الشهري
إحتضار الحلم
الإهداءات
الوقت غدار (بقلمي)
العرض العادي
